اسلام آباد: وزیرِ اعظم عمران خان سے 25 ممالک کے 60 سے زائد مندوبین نے ملاقات کی، وزیرِ اعظم نے مندوبین سے کہا کہ آج کا پاکستان یک سر تبدیل ہو چکا ہے۔تفصیلات کے مطابق بدھ کو 25 ممالک کے 60 سے زائد مندوبین نے وزیر اعظم عمران خان سے ملاقات کی، مندوبین اسلام آباد سمٹ میں شرکت کے لیے پاکستان آئے ہیں۔ملاقات میں مشیر تجارت عبد الرزاق دائود، وزیرِ اطلاعات فواد چوہدری، چیئرمین سرمایہ کاری بورڈ ہارون شریف، معاون خصوصی نعیم الحق اور افتخار درانی بھی شامل تھے۔
وزیرِ اعظم عمران خان نے مندوبین سے گفتگو کرتے ہوئے کہا کہ آج کاپاکستان یک سر تبدیل ہو چکا ہے، نیا پاکستان پر امن اور ابھرتے ہوئے سماجی و معاشی مواقع سے بھرپور ہے۔وزیرِ اعظم نے کہا کہ ہم بزنس کمیونٹی کو منافع بخش کاروبار کے مواقع فراہم کرنے پر یقین رکھتے ہیں، پاکستان میں معروف بین الاقوامی سرمایہ کار سرمایہ کاری کر رہے ہیں۔ واضح رہے کہ وزیرِ اعظم عمران خان برطانوی شہریوں کے لیے آج جمعرات کو دن 12 بجے ویڈیو کال پر ای ویزا سروس کا افتتاح کریں گے،
جس کے بعد برطانوی شہری گھر بیٹھے پاکستانی ویزا حاصل کر سکیں گے۔برطانوی شہریوں کے لیے ای ویزا کی سہولت کے آغاز سے ای ویزے سے قونصلر سروسز میں کام کا بوجھ کم ہو جائے گا اور عوام گھر بیٹھے پاکستانی ویزا حاصل کر پائیں گے۔
