66

کپتانی نہیں چھوڑ رہا، حتمی فیصلہ پی سی بی کرے گا، سرفراز احمد

پوری ٹیم اپنی اور کوچ کی مرضی سے ہی منتخب کی تھی، سرفراز احمد — فائل فوٹو: اے ایف پی
پوری ٹیم اپنی اور کوچ کی مرضی سے ہی منتخب کی تھی، سرفراز احمد — فائل فوٹو: اے ایف پی

پاکستان کرکٹ ٹیم کے کپتان سرفراز احمد نے تصدیق کی ہے کہ وہ قومی ٹیم کی کپتانی نہیں چھوڑ رہے۔

نیشنل اسٹیڈیم کراچی میں پریس کانفرنس کرتے ہوئے سرفراز احمد کا کہنا تھا کہ قومی ٹیم کی کپتانی کا فیصلہ بورڈ نے کرنا ہے کیونکہ سارے فیصلے وہی کرتے ہیں۔

کرکٹ ورلڈکپ 2019 کے دوران قومی ٹیم کے ایونٹ سے باہر ہونے کے باوجود کھلاڑیوں کی فارمنس کو سرفراز احمد نے بہتر قرار دے دیا۔

ان کا کہنا تھا کہ کھلاڑیوں نے اچھا کھیل پیش کیا، ہم بد قسمتی کے ساتھ ورلڈکپ کے سیمی فائنل میں نہیں پہنچ سکے۔

ایک سوال کے جواب میں سرفراز احمد نے کہا کہ پوری ٹیم ان کی اور کوچ کی مرضی سے ہی منتخب کی گئی تھی جبکہ صرف وہاب ریاض اس ٹیم کا حصہ نہیں تھے۔

اپنی بیٹنگ پوزیشن کے بارے پوچھے گئے ایک سوال کے جواب میں سرفراز احمد کا کہنا تھا کہ میں نے ورلڈکپ میں جانے سے قبل ہی میں نے کہا تھا کہ میں نمبر 5 میں کھیلوں، لیکن ایونٹ کے دوران ہمیں بیٹنگ آرڈر میں تبدیلی کرنی پڑی۔

محمد حسنین کے بارے میں پوچھے گئے سوال کے بارے میں سرفراز احمد نے بتایا کہ ہم ابتدائی میچوں میں اپنے سینئر کھلاڑیوں کے ساتھ میچ میں گئے تھے۔

سرفراز احمد نے ایک سوال کے جواب میں کہا کہ میں کھلاڑیوں کو اچھے سے جانتا ہوں، اگر مجھے موقع ملے تو میں آئندہ ایونٹ کے لیے ٹیم کو بہتر بنانے کی کوشش کروں گا۔

ٹیم کی خراب کارکردگی اور قوم سے معافی مانگنے کے سوال کے جواب میں سرفراز احمد نے معافی مانگنے سے انکار کر دیا اور موقف اپنایا کہ ان کی ٹیم 2 نہیں بلکہ 11 پوائنٹس لے کر ایونٹ سے باہر ہوئی ہے۔

پاکستان کرکٹ کے اسٹرکچر پر بات کرتے ہوئے سرفراز احمد کا کہنا تھا کہ انہوں نے سنا ہے کہ ڈومیسٹک کرکٹ میں ٹیموں کی تعداد کو 6 کر دیا گیا ہے تاہم میری تجویز ہے کہ ان کی تعداد 8 کی جائیں۔

سرفراز احمد نے بتایا کہ بھارت سے شکست کے بعد ہمیں بڑی پریشانی کا سامنا کرنا پڑا اور اسی وجہ سے کھلاڑیوں کے لیے 2 روز کا وقفہ لیا، تاہم اس کے بعد ایک میٹنگ کی جس میں کھلاڑیوں کی پرفارمنس کا جائزہ لیا گیا۔

اس خبر پر اپنی رائے کا اظہار کریں

اپنا تبصرہ بھیجیں