سیالکوٹ: معاون خصوصی برائے اطلاعات و نشریات ڈاکٹر فردوس عاشق اعوان کا کہنا ہے کہ نواز شریف کی بیماری محل سے جڑی ہے وہ محل پہنچتے ہیں اور ٹھیک ہوجاتے ہیں۔
سیالکوٹ میں میڈیا سے گفتگو کے دوران فردوس عاشق اعوان کا کہنا تھا کہ ہمیں اپنے ڈاکٹرز پر فخر ہے، ہمارے ڈاکٹرز باصلاحیت ہیں،نواز شریف کے یہاں پلیٹ لیٹس کم ہورہے تھے بلڈر پریشر بڑھ رہا تھا، اس وقت دوسرا بھائی بیمار کے ساتھ سہولت کار کے طور پر ساتھ گیا، آج نوازشریف کو گئے ہوئے کئی دن ہوگئے لیکن بیماری سے متعلق کوئی بات سامنے نہیں آئی،(ن) لیگ کے رہنما اور کارکن باربار کہہ رہے تھے کہ نواز شریف کی حالت نازک ہے لیکن اب وہ نواز شریف کی موجودہ صحت کی صورتحال بتانے سے قاصر ہیں۔ اتنےروز گزرنے کے بعد بھی نواز شریف کی بیماری سے متعلق بین الاقوامی ڈاکٹرز کی رپورٹ سامنے نہیں آئیں۔
فردوس عاشق اعوان نے کہا کہ حقائق چھپ نہیں سکتے، نوازشریف آستینیں چڑھا کر ایک ہی گردان سناتے رہے کہ میرا جینا مرنا عوام کے ساتھ ہے، ووٹ کو عزت دوں گا، ہمیں پتا ہے اس بیماری کا نام کیا ہے اور ان کا ایجنڈا کیا ہے، نوازشریف کی نبض پر ہاتھ رکھ کر کوئی سیاستدان ہی بتاسکتا ہے کہ ان کو سیاسی بیماری ہے، نواز شریف کی بیماری محل سے جڑی ہے، وہ محل پہنچتے ہیں اور ٹھیک ہوجاتے ہیں،فردوس عاشق اعوان نے کہا کہ کیا نواز شریف کی زندگی کو لاحق خطرات پاکستان سے نکلتے ہی ختم ہوگئے ہیں، شہبازشریف نے لوٹ پوٹ ہوکر پبلک اکاؤنٹس کمیٹی کے چیئرمین کا عہدہ لیا اور چپکے سے استعفیٰ بھی دے دیا۔
معاون خصو صی نے کہا کہ حکومت کے سامنے بےروزگاری اور مہنگائی کا چیلنج ہے، عمران خان نے ملک کی معیشت پر مرہم رکھا ہے اور وہی عوام کو ریلیف دیں گے، جب صنعتیں لگیں گی تو غریب کے گھر کا چولہا جلے گا، حکومت یکساں نظام تعلیم کی طرف رواں دواں ہے، تمام صوبائی حکومتیں وزیراعظم کی پالیسی پر عملدرآمد کےلیے پر عزم ہیں، اگر تعلیم کے ساتھ تربیت نہ ہو تو بےروزگاروں کی کھیپ نکلےگی۔
اس سے قبل اپنی ٹوئٹ میں فردوس عاشق اعوان کا کہنا تھا کہ بیرون ملک بینک اکاؤنٹس، کاروبار اور علاج کروانے والے اور ان کے ہم نواء فارن فنڈنگ کیس میں بھی منہ کی کھائیں گے۔ اپوزیشن سیاسی منافقت کی زندہ مثال بن چکی ہے۔الیکشن کمیشن پر فارم 45 اور آر ٹی ایس کے حوالے سے الزام عائد کرنے والے آج نئے بہروپ میں الیکشن کمیشن کو سیاسی دھمکیاں دے رہے ہیں۔
