0

پڑھائی کے دوران چیزوں کو یاد رکھنے کیلئے دلچسپ فونٹ ’سانس فورگیٹیکا‘ متعارف

تعلیم حاصل کرنے کے لیے توجہ سے پڑھنا ضروری ہوتا ہے، ساتھ ہی یہ بھی اہم ہے کہ جو پڑھا ہو اسے یاد بھی رکھا جائے۔ اس مقصد کے لیے ایک دلچسپ فونٹ ’سانس فورگیٹیکا‘ متعارف کردیا گیا ہے، جس کی مدد سے الفاظ کو یادداشت میں محفوظ رکھنا سہل ہوسکے گا۔

نیا فونٹ ’سانس فورگیٹیکا‘، آسٹریلیا کی میلبورن یونیورسٹی کے ماہرین اور ٹائپوگرافی سمیت رویوں سے متعلق علم رکھنے والے ڈیزائنرز کی جانب سے پیش کیا گیا ہے، جس کی مدد سے پڑھنے والوں کو اس لحاظ سے آسانی ہوگی کہ جو کچھ وہ پڑھ رہے ہوں، اسے آسانی سے ذہن نشین بھی کرسکیں۔

اس فونٹ کا ڈیزائن ایلبیئون فونٹ سے بنایا گیا ہے، جس میں کچھ اختراع کی گئی ہے۔ اس کا اہم مقصد پڑھنے والے کی دماغی دلچسپی بڑھانا اور اُس کو مدد فراہم کرنا ہے تاکہ وہ زیادہ جلدی معلومات حاصل کرسکے۔

ماہرین کے مطابق سانس فورگیٹیکا کو اس طرح سے ڈیزائن کیا گیا ہے کہ یہ طلباء کو امتحانات کی تیاری کرنے میں مدد دے گا۔

فونٹ کی ڈیزائننگ میں شریک ایک محقق پیرامین کے مطابق ’ہمارا ماننا ہے کہ پہلی بار مخصوص ڈیزائن تھیوری اور ذہنی تھیوری کو ملا کر دلچسپ فونٹ ڈیزائن کیا گیا ہے، جو سب کی توجہ کا مرکز بنے گا’۔

ڈیزائنرز کا کہنا ہے کہ جب کوئی پڑھ رہا ہوتا ہے تو ضروری نہیں کہ وہ اسے ذہن نشین بھی کر رہا ہو، اکثر ایسا دیکھا گیا ہے کہ بظاہر تو کوئی شخص کتاب کھولے بیٹھا ہوتا ہے لیکن اس کے دماغ میں کسی بھی قسم کی معلومات جذب نہیں ہوتیں۔

تاہم اس فونٹ کو اس طرح سے ڈیزائن کیا گیا ہے، جو ادراک کی صلاحیتوں پر مبنی ہے اور جس سے کوئی بھی پڑھی ہوئی چیز ذہن میں بیٹھ سکتی ہے۔

اس خبر پر اپنی رائے کا اظہار کریں