سندھ حکومت نے صوبے کے مختلف شہروں میں عید الفطر کے بعد نئے ٹرانسپورٹ منصوبوں کا اعلان کردیا۔
سینئر صوبائی وزیر شرجیل میمن نے کہا ہے کہ عید کے بعد کراچی میں الیکٹرک بسوں کے نئے روٹس شروع کئے جائیں گے۔
انہوں نے کہا کہ کراچی میں خواتین کےلیے مخصوص پنک بس سروس کا دوسرا مرحلہ بھی شروع کیا جارہا ہے۔
صوبائی وزیر نے مزید کہا کہ عید کے بعد کراچی میں اورنج لائن اور گرین لائن کے درمیان مفت شٹل سروس کا بھی آغاز کیا جا رہا ہے۔
ان کا کہنا تھا کہ چیئرمین بلاول بھٹو زرداری کی ہدایات پر عید کے فوری بعد ٹرانسپورٹ کے نئے منصوبے کے آغاز کا اعلان کیا جائے گا۔
شرجیل میمن نے یہ بھی کہا کہ میرپور خاص میں عوام الناس کو سفری سہولیات کی فراہمی کے لئے پیپلز بس سروس شروع کی جائے گی۔
انہوں نے کہا کہ پبلک ٹرانسپورٹ استعمال کرنے والوں کے لیے کیش لیس ٹکٹ سروس متعارف کروائی جائے گی۔
صوبائی وزیر نے کہا کہ سندھ حکومت کی جانب سے اورنج لائن بی آر ٹی اور ریڈ لائن بی آر ٹی کو جوڑنے کے لئے مفت شٹل سروس شروع کی جائے گی۔
